都靈地鐵, 今次第一次搭...事緣上年只得一d住宅同郊區嘅站起好啟用；今次再來時, 連市中心Porta Nuova站都已啟用。出於好奇心, 我地比$搭下都靈嘅地鐵, 睇下同香港或其他城市嘅地鐵系統有乜分別先!!
過晒2006都靈冬季奧運, 地鐵先至全面啟用, 效率"真係一流"!!!
地鐵站入口。
地鐵站設計現代化, 入口好寬敞舒適, 完全唔擠迫。我地在平日下午非繁忙時間搭車, 人流超稀疏; 唔知繁忙時間係咪都係如此呢? 如果係, 真係好擔心地鐵公司點為本??
候車嘅月台冇乜人咁滯... 靜英英咁, 不過都靈大致上係好安全嘅城市, 治安我就唔太擔心。
車廂好迷你, 好細。
好大呀, 但亦係冇乜人喎!!!
睇完地鐵睇下街景。都靈至優雅有貴族氣派嘅地方之一, 就係Piazza Castello (Castello廣場)一帶。
外面同裡面都一樣咁grand嘅Palazzo Madama (Madama Palace)。建於13世紀, 建在舊羅馬城門嘅位置。 在17世紀時改為此名, 因為佢係當時皇帝Vittorio Amedeo I嘅遺妻Madama Reale Maria Cristina嘅居所。
在Palazzo Madama隔離係Palazzo Reale (皇宮)。呢度我要講少少野...我諗我同呢個地方完全冇緣, 我大大話話, 想去呢度有4次, 但每次各有不同原因而入唔到去參觀。
幸好呢日天氣晴朗。今次在都靈期間, 天氣不太穩定, 經常突然落大雨, 同上次好唔同。
以下兩張相記錄番我地有一日聯同我地一位同學, 一齊去左Parco del Valentino (Valentino公園)遊玩。個公園好大, 我地都唔夠時間行晒佢 (唔通留番下一次再去??)。公園在1856年開始開放。
Borgo Medievale ~ 中世紀村。個村好得意, 但佢並非真正係一個中世紀村莊, 只係模仿中世紀村莊所造咋。呢個村莊, 在大水浸時亦浸晒, 好慘。
個pizza大得太緊要, 好彩兩個人share.... 我一個人食的話, 可以分兩至三餐食都得。
River Po一帶景色。 靚絕! 寧靜, 優雅, 漂亮....天氣好嘅日子, 沿著河邊漫步, 令人心曠神怡。不過冬天就返屋企休息歎下暖氣算喇, 行呢度肯定凍鬼死!!!
有樣野我記住要講, 就係我在都靈一個星期裡邊, 有3次在街上見到祖記球員。首先係4月30日, 意大利慶祝5.1勞動節假期前一日, 我在一條街上見到史丹達度。當時條街冇乜人, 我見到佢時嚇左一跳, 事關完全冇諗過見到球員。佢當時講緊電話, 有個男人同佢一齊行, 我望左幾望之後, 個男人話 "佢係球員", 我答佢, "係呀", 然後我在個袋內攞左條祖記頸巾出來比佢睇。可能史丹達度知我識佢, 所以我微笑望住佢時, 佢微笑同我打招呼, say "ciao" (=hello)。
第二日, 5月1日, 意大利假期, 周街都迫滿人, 我在同一條街, 差不多位置, 竟然見到佳基拉!!! 我見佢推住架BB車, 裡面係佢個BB, 而佢前面個金髮女人, 就好鬼寫意食住gelato行.....做佢老婆又幾好喎, 個老公睇個BB。我意想不到會在此見到球員 (又一次), 所以鬼咁驚訝望住佢, 佢發現我睇住佢添...大家打左個招呼, 我就行了....我有想過走埋去影相, 但當時條街真係太過多人, 同埋呢日假期, 費是打擾人啦。不過最重要係, 佢唔係Palla或者隊長或者保方或者馬基安尼 (當時仲鐘意佢嘛)! 如果唔係我一定打擾佢地, 哈哈。
跟著嗰日, 我又見到一個祖記球員。今次最騎呢, 因為唔係我首先發現個球員, 而係個球員首先見到我! 話說我行緊一條路 (又係嗰條路), 當日條街冇乜人, 我附近冇人行緊的。我準備想過條橫街嘅班馬線時, 突然有人大叫一聲! 跟著我即刻望望係邊個大叫。原來是在我即將要過嘅班馬線前嗰架車, 裡邊個男人 (司機位)大叫, 佢隔離有個金髮女子。我望真d, 嘩, 原來係洛斯連奴喎!!! 我原先唔知佢仲乜大叫, 我側側地身望下佢, 然後好奇睇多兩眼, 跟著在佢面前過馬路(我當時真係要過馬路的), 過完馬路, 佢開車, 我望番轉頭, 佢竟然伸左隻手出來同我揮手 (但佢個人就並無轉身), 大叫左一聲 "ciao", 然後繼續開車走!!!! 好騎呢, 我從頭到尾唔知點解佢大叫, 又向我say ciao....當時附近根本冇第二d人, 唔係我的話, 就冇人見到佢。但點解佢咁 r 頭???
莫非佢在之前個星期六見到我等祖記球員?? 當日我見到佢出現, 我仲企左係佢架私家車前面一陣添, 不過佢當時惡到爆, 我隔離個意大利男仔想搵佢簽名, 但洛斯連奴寸到爆, 只在車內舉起隻手指 (不過唔係中指)叫佢行開。短短見過嗰一陣, 冇理由隔左成個禮拜佢仲會記得我....佢又唔係Palla, 我都冇同過佢傾過計....我認為佢應該只係無聊大叫...我地今次在意大利, 試過好多次, 在街上行行下, 無情情有人會在私家車內向我地大叫, 又唔知佢叫乜, 好鬼無聊。最記得其中有次在熱拿亞, 就有成班人在佢地架車內向我地大叫。 都唔明有乜咁好大叫!!! 有時佢地d行徑好鬼低B白痴!!
~~ 穿梭意大利2008 ~~ 待續 ~~
No comments:
Post a Comment