呢個葡萄牙之旅寫左咁耐, 唔似我性格...哈哈哈
, 所以希望藉住復活節假期有多少少時間, 快D去講埋個旅程先得....熟悉本人嘅blog友都知我鐘意睇足球, 雖然我嘅第一最愛係意大利國家隊同埋祖雲達斯, 但一場來到葡萄牙, 我都好想睇番一場足球比賽, 最應該當然係睇里斯本市嘅Benfica (賓菲加)啦!
Benfica依家在葡超聯賽排緊第一...佢地就好啦, 我地嘅祖記, 唉, 講來sai氣, 有資格踢到下屆歐霸杯都已經偷笑!
講番賓菲加...我同朋友因為有免費波飛, 所以唔駛錢有得入場睇波, 正正正!!
在此多謝朋友嘅好帶hit! 
賓菲加嘅跟據地 - 光明球場 (Estadio da Luz), 位在市中心, 超級易去, 超級方便, 做佢地球迷真係好! 球場曾經為2004年葡萄牙舉辦歐洲國家杯而特登重建, 所以裡面又新又靚又大, 主場顏色仲係...我最喜歡嘅紅色呢!! 嘻嘻!
見到呢度...就掛住祖記嘅主場, 好想有機會又返去都靈睇球賽呀!!
球場雖然好大, 不過搵自己個位都唔難, 當然我都冇乜搵過, 我朋友做帶頭, 嘻嘻...
球場保安都係普通檢查啦...但可以帶水樽入去喎!! 反而祖記主場唔准帶水樽, 連縮骨遮都唔比帶入場, 好麻煩。入面有舖頭我地可以買野食買野飲, 裡面工作嘅人好友善, 雖然我同佢地雞同鴨講, 但佢地好有耐性同我講有乜野食, 幾錢等, 果然貫徹葡萄牙人好友善嘅一面。
唔記得講, 睇嘅呢場比賽係葡萄牙聯賽杯, 賓菲加主場對國民隊。最後賓菲加勝 1:0, 入球嘅係沙維奧拿。
好啦, 終於講完里斯本呢一部份, 下站終於可以講下個城市喇!!
穿梭葡萄牙之旅 2009/10 - 待續!
No comments:
Post a Comment