去到呢個小鎮後, 發現呢個鎮, 比起Susa係更加之靜, 連人都好似唔多見到。呢個鎮嘅人去晒邊? 如果得我一個人, 我覺得我已經掉轉頭, 搭火車返去都靈。旅遊資料講到呢個小鎮好似好有吸引力咁...
寧靜嘅 Avigliana 火車站
根據我地在手嘅非常簡單鎮資料, 我地往山上跑.....樓梯...又係樓梯。我地喺呢條樓梯發現左一條乾屍 ~ 四腳蛇乾屍...你話呢度幾耐冇人掃地?? 或者D居民特登唔掃走條屍.... 沿路上去 Chiesa di Santa Maria Maggiore (Santa Maria Maggiore教堂)
呢間教堂並無開門, 而在呢個咁偏僻又靜嘅半山上, 竟然有一位女子, 駕車上來, 泊低架車, 坐左喺一張凳上睇書! 如果唔好彩喺呢度比人打刼或者.... 應該係叫天不應。
不過從呢度望落山下又的而且確好靚, 盡是紅磚屋頂, 再配以綠山做背景, 加埋藍天白雲, 攪到我都覺得心境平和一D。
呢個地方, 浪費我地時間搵佢。搵到後, 發現根本就唔係對外開放, 係私人地方! 搵笨!! 我地在欄杆外影入大宅裡。呢個景點叫 "Torre Circolare della Cinta Muraria"。即管叫佢做 "圓型高塔"。
再之後, 我地沿山路往下走。再搵呢一景點。Porta San Pietro ~ St Peter Door。
一路上, 都有一D好有歷史價值嘅建築, 不過因為缺乏英文解釋, 我地有冇乜旅遊資料在手, 所以只係隨心一路行一路停低欣賞, 周圍看看, 影影相, 又繼續行。
今日, 就如此渡過。雖然Susa同埋Avigliana景點冇我地想象中咁豐富, 不過認識左一D意大利小鎮風情, 同埋見識到, 原來有D意大利小鎮真係冇乜人, 好靜, 靜到出奇。除左一般大眾認識嘅大城市, 例如米蘭、佛羅倫斯同埋羅馬, 可以去呢種非常細小嘅地方見識都幾特別幾有意思。
下回繼續第二日都靈市外小鎮遊 (3)
~~ 穿梭意大利2008 ~~ 待續 ~~
No comments:
Post a Comment