葡萄牙之旅 10 - 遊 Fatima (花地瑪)

積極, 積極, 積極繼續寫我嘅葡萄牙之旅

呢日上午短遊完Tomar之後, 就搭巴士去下一個目的地 - Fatima (花地瑪)。

花地瑪其實係一個非常細嘅小鎮, 如果唔係著名嘅聖母瑪利亞顯靈事件, 相信唔會每年吸引數以百萬嘅信徒同埋旅遊人士造訪。三個小孩子 (Lucia Santos, Jacinta Marto, Francisco Matro) 在1917年5月13日開始, 連續6個月同一日聲稱看到聖母瑪利亞顯靈,  (稱為Three Secrets of Fatima), 顯靈事件如此著名, 最重要原因係因為當時三個小孩提到, 聖母預言: (1) 第一次世界大戰將會結束,但會有第二次世界大戰發生, 但蘇聯共產主義會興起及帶來迫害;  (2) 蘇聯會解體; (3) 以及一位教宗 (= 約翰保祿二世 Pope John Paul II) 會遇刺, 呢幾次嘅顯靈係被羅馬教廷所承認和記錄低的。

一去到花地瑪巴士總站, 只要出番總站外嘅大路, 轉右行大約5分鐘, 就會去到一個比羅馬Vatican City更大嘅廣場, 呢度就係來Fatima參觀嘅重點。遠看就見到Our Lady of Fatima Bascilia (花地瑪大教堂), 教堂兩側係半圓形嘅柱廊。大教堂和柱廊都建築得極具威嚴, 尤其柱廊, 好值得慢慢行慢慢參觀。由於教堂內正舉行彌撤, 我無法入內參觀, 覺得非常可惜, 希望有下次啦, 如果下次再去葡萄牙, 一定會再去Fatima參觀的。

當日我到達後不到10分鐘, 突然狂風大雨, 好彩多得呢兩邊柱廊幫我遮頭, 如果唔係一定全身濕晒!!  講時講, 葡萄牙嘅風加雨係超級強勁, 我把遮差唔多吹爛咁滯 (後話: 終於在波圖被吹反, 要買過把新嘅)。

美麗而又莊嚴嘅 Our Lady of Fatima Bascilia (Nossa Senhora do Rosário da Fátima)

 

 

 

神奇嘅事都發生在我身上, 因為原先我諗住天氣咁差, 會縮短行情, 早d返去Lisbon的。但在柱廊避雨同欣賞牆上有關聯耶穌受難嘅畫大約半個鐘頭後, 天氣開始好轉, 仲竟然出埋太陽!!  咁我就開始行番出廣場出面行, 影相等等。我都好想感謝聖母呢。

從大教堂向廣場看出去, 右手邊有一個開放式小教堂叫 The Chapel of Apparitions; 另外旁邊仲有一個地方, 教徒可以自行付錢買蠟燭, 點燃插上架上, 我都買左一支最平嘅 0.5euros蠟燭插到架上, 祈求天主保祐一切平安。

 The Shrine of Fatima

 

見仲有少少時間先夠鐘搭巴士返 Lisbon, 就沿右手邊一條路亂行一通, 原來行到去Fatima嘅購物區!!  所謂購物區當然唔係買乜野名牌衫、名牌手袋。呢度嘅小型購物區有好多地舖和一、兩個商場, 但差不多都係清一式售賣天主教嘅宗教物品 & 飾物, 如果唔係教徒, 可能不出5分鐘就會離開。

 

 

由Tomar坐巴士過來時, 車上人都唔多個, 但返Lisbon就全架車都坐滿人, 而且係連開兩架巴士。在巴士上認識左一位西班牙男士, 同埋一位葡萄牙嘅老婆婆, 婆婆雖然年紀唔細, 但英文都唔錯, 佢仲同我講佢由細到大聽英文歌, 咁鬼yeah嘅, 哈哈!

話時話, 以我多日來觀察所得, 葡萄牙應該好流行聽英文歌, 因為呢度嘅電台日日都播好多英文歌, 而電視台晚晚亦都播西片, 仲要冇配音, 係英語廣播加葡文字幕的, 唔怪得葡國人普遍英文都唔差啦 (相比起意大利, 嘻嘻)。

以下呢個網站介紹Fatima, 資料好豐富, 有興趣遊覽Fatima的話可以睇下:
http://www.sacred-destinations.com/portugal/fatima-shrine-of-our-lady-of-fatima


講完Fatima喇, 好野!!!  下一站係: 另一小鎮Alcobaca!! 

2009-10葡萄牙之旅 - 待續!!