學習意大利語 Learning Italian!

voicexml

不經不覺間, 正正式式咁學意大利文都學左差不多兩年了。 又一次証明, 學一種新東西真係要投入好多時間、金錢、心機, 仲要好鬼有堅持，好有耐力、恆心。 依家每個星期要返兩日學 - 星期三晚銅鑼灣兩個半鐘; 最期日就下午兩個鐘, 去到對於我來講係山長水遠嘅大埔。忙忙碌碌.....

其實上堂係一件事, 之後溫書又係另一件事。每次都有好多新野, 若然在下一堂之前冇溫到書嘅話，就會開始跟唔上，所以得的話, 我都盡量溫書, 不過因為呢排實在忙得交關，冇乜點溫, 後果即刻見到, 就係開始積埋好多嘅野....

有唔少朋友問過我, 意大利文難唔難學...我自已覺得學發音叫比較易, 因為一個意大利文字, 都係跟著vowels來發音；例如, camera (解房間), 見到有三個vowels (camera), 所以就讀成: ca me ra; 另外就有d字有特定發音, 例如, Inzaghi (恩沙基個姓氏), ghi讀成 gee, 所以就係 In za gee。對我來講, 最難應該係發個 "r"音, 要震著捲舌來講, 初頭覺得特別難 (好多香港人亦覺難讀到)。

不過....最難一定係文法，簡直攞命 (加埋我天份低呢)!! 拉丁語系最複雜之處 - grammar。 都唔明點解有10幾種tenses, 而每一個動詞都要改動, 簡直係人都顛。唔知大家明唔明我講梗乜, 舉個例子:

英文裡: "去"這一個動詞 - go, 現在式係 go/goes (視乎係 I, we, they, you, 定係he, she, it而唔同), 過去式係 went, 將來式係 will go。呢d大家實識啦。

不過在意文: "去"這個動詞 - andare, 現在式有六個可能 (!!):

vado (I go), vai (he/she goes), va (就如中文的: 您去), andiamo (we go), andate (你們去), vanno (他們去)

所以: Vado al bar (I go to the bar), Vai al bar? (You go to the bar?), Andiamo al bar. (We go to the bar.) etc....

記一個動詞, 要記6個轉法, 而呢個只係現在式, 如果係過去式, 又係有6個轉法:

意大利文 "去"的過去式:

andavo (I went), andavi (you went), andava (您went), andavamo (we went), andavate (你們去), andavano (他們去)

佢地係有幾種過去式的! 另外, 仲有將來式, present conditional, present subjunctive, imperative, present perfect, past perfect等等, 嚇鬼!!!

中文文法係咪易好多, 簡單好多呢??? 所以我讀咁耐以來, 見過無數人讀讀下消失左, 我覺得係絕對可以理解....如果唔係因為呢個係意大利文, 我都消失左好耐! 好多年前, 我搵唔到地方學意大利文, 就去學最接近佢嘅西班牙文, 不過最後頂唔順放棄左 (不過都花左有兩年時間, 上堂完全係浪費梗光陰同銀兩!!)。後來終於搵到學意文嘅途徑。

兩種語言嘅grammatical structures好類似, 有d字嘅串法同發音亦相似, 可能源於佢地都係拉丁語系。如果我之前唔係因為接觸過西班牙文, 我諗對我來講意大利文更難上手。

可惜在香港, 意大利文冇其它語言, 例如法文、日文甚至韓文咁流行, 如果多d人學意大利文, demand大, 價錢一定可以向下調! 雖然話難啫, 我相信香港地有好多有興趣學意大利文嘅有志之士。