葡萄牙之旅 14 - 遊 Porto!

終於有時間繼續講下個葡萄牙之旅了, 講來真係好笑, 唔知下次出發再去葡萄牙之前, 我可以完成了呢個旅程嘅遊記未呢??

從Lisbon (里斯本) 搭火車上去北部另一大城市 Porto (波圖), 火車好新好乾淨, 大約3個半鐘頭左右就去到波圖喇。在葡萄牙坐長途火車似乎頗安全, 因為冇話見到d騎呢人, 個個樣看上去都好正經, 我都試過放低行李去左次洗手間, 好彩返回位時佢仲存在, 哈哈哈。

只消3個幾鐘頭, 就到了 Porto: 一個無論市容同感覺都與Lisbon 好唔同嘅城市喇。如果個人要作一些比較, 我會覺得, Lisbon比較現代化; 至於Porto, 感覺比較古舊。

唔知點解, 來到Porto, 有些少恐懼感, 因為街道都比較漆黑、寂靜, 加上在三日裡頭, 天氣非常差, 不單狂落大雨, 而且好大風, 令自己覺得好孤單。

Porto嘅街道大多數都比較舊 (sorry講句, 其實比較殘舊), 而且好多看上去好似日久失修, 特別係由San Bento Station往下去Ribeira (即著名Ponte Luis/ Luis橋)一帶嘅舖頭, 不少都已經不再營業。見到呢d景物時, 有一種說不出嘅傷感感覺。

但另一方面, 我又為自己能夠見到一個咁有懷舊感嘅地方而開心。當我地香港人不斷為不能保護有歷史價值嘅建築物被拆除改建而痛心嘅同時, 在遙遠嘅葡萄牙, 我反而有機會跟著旅遊書嘅介紹, 藉著慢步到處欣賞波圖嘅古老建築, 好似時光倒流, 帶自己重回舊時。
 

 

 

 

相信每一位到波圖旅遊嘅朋友都唔會唔來呢度...如果唔係點算來過波圖呢, 哈哈哈!  我講嘅係波圖火車站 San Bento。呢個火車站之所以咁出名, 全靠火車站大堂內嘅古典優雅嘅裝飾, 同埋美不勝收, 由傳統葡萄牙藍白磁磚構成嘅歷史故事圖案畫。一句講晒 --- 靚絕!!!   

 

 

 

我住嘅酒店在市中心區, 好近美麗嘅火車站 San Bento (步行大約只需5-10分鐘)。在波圖嘅3日2夜裡邊, 我都冇搭過任何交通公具 (另一原因係: 波圖嘅旅遊點全部都可以步行去到 -- 除左去Duoro區參觀葡萄園例外?)。Ribeira (Douro河岸兩旁)真係好靚, 尤其晚上當Ponte Luis橋亮晒燈, 兩岸嘅平房都開晒黃燈之後, 超romantic (車, 最弊我一個人懵懵咁被風吹到飛起咁沿著行逛, 一些都不romantic, 哈哈哈)。

 

 

 

 

 

 

 

 

花左 2 euros, 入左 Clérigos Church & Clérigos Tower ( Igreja dos Clérigos & Torre dos Clérigos) 參觀。Clerigos塔係全葡萄牙最高嘅塔, 有6層, 225級樓梯, 72米高。未上塔之前個天已經好黑, 但就未開始落雨, 我考慮左一陣應唔應該行上塔頂, 因為如果上到去狂落大雨就死得。最後都係上!  有今生冇來世, 都唔知幾時會再來Porto, 上左先算! 行到氣喘終於上到塔頂, 好彩有上來, 因為從上往下俯瞰波圖市, 有另一番感覺。一片紅磚屋頂嘅平房, 我還可以找出一些波圖市地標建築, 嘻嘻!

睇完一輪, 雨開始來臨喇!  加埋強勁嘅風, 非同小何, 速速離開為妙!!

 

 

 

(以下兩張照片取自wikipedia.org - http://en.wikipedia.org/wiki/File:Cl%C3%A9rigos_Tower_Photo.jpg) 係唔係同我自己影嘅差好遠呢? 因為我去嘅幾日天氣太衰, 影嘅相全部都變成黑麻麻), 想比大家睇睇原本呢兩個景物應該係何其美麗的。

 

慕名參觀一間在波圖  (甚至全葡萄牙) 非常著名嘅一間書店 - Livraria Lello & Irmão (Lello & Irmão Bookstore)。書店建於1906年, 外觀同埋內部裝修得極其華麗。據旅遊書所介紹, 書店內部看似用木作結構, 但實情係用塗上了顏料嘅石膏再加上金葉所造! 又真係睇唔出呀。個人覺得絕對值得參觀呢。

 

 

 

特別想提下呢間聖堂 - Igreja do Carmo. 我見到佢嘅時候, 真係被佢外表深深吸引住呀 (靚過靚仔呀)!  呢間聖堂嘅其中一幅牆, 全部鋪滿葡萄牙傳統嘅藍白磁磚, 當然亦係砌成傳神嘅故事呢。我睇左幅畫好耐, 真係唔捨得離開呀。

 

無意中行經呢座樓, 不期然要停下欣賞, 亦不期然要攞出個相機出來拍照, 事關呢座樓掛上嘅葡萄牙國旗應該不少於10張!!  真係想知點解呢座樓嘅人咁特別愛國嘅?? 咁齊心全部人都掛支國旗出自己騎樓來咁得意的?? 一定要比個讚佢地先得呀!!!

話咁快就講完Porto喇!!!  Porto的而且確係一個好特別嘅城市 --- 特別在我去到之後, 有種時光倒流70年 (或更長時間)嘅感覺。可能加上我在波圖遊玩時, 正值冬天加上天氣非常差, 經常陰雲密布, 更令呢個城市多添一份淒美。

我絕對一定要再來波圖呀, 因為我覺得自己好似冇來過一樣。日日黑天黑地, 再唔係就狂風暴雨, 我把遮都被吹爛。每次見到別人去波圖影嘅靚相, 我就想喊!! 點解人地去嘅時候天氣咁好, 風景咁靚架???? 點解我攪成咁嘅? 唔得, 將來一定要再來一次呀!!!

在逗留Porto嘅幾日之中, 其中一日我去左波圖附近一個叫Braga嘅城市參觀, 下一回, 我將會談談呢個令我極之喜愛嘅城市。

下一站 -- Braga布拉加!

穿梭葡萄牙之旅 2009-10 -- 待續!!