在佛羅倫斯第二日, 去左一個比較特別嘅地方 ~ 中央市場 (Mercato Centrale)。實在佢係一個街市, 一間好乾淨企理, 每日只開一個早上, 位放市中心, 接近San Lorenzo教堂嘅街市。
街市唔駛錢入場(當然啦!!), 而且裡邊買嘅野比街外平好多。我地就係呢度食左D好平嘅生果; 又買左蒸餾水飲。裡面仲有好多意大利食物, 喜歡煮兩餐嘅人一定好鐘意。 街市分兩層: 下層多數係肉檔, 同賣意粉、菌類食物之類嘅舖頭; 而上層多數係生果舖。
呢度依家都有唔少遊客慕名而來, 當日我地亦見到有好多學生, 坐在此畫畫。
中央市場嘅外貌, 胡杏兒之前替無線拍 "向世界出發", 都有參觀呢度。
裡面售賣嘅物品種類好多, 簡直大開眼界。
菌類食物 ~ 種類真係繁多。
奇形怪狀嘅意粉, 顏色彬分, 好吸引呀!!
一條一條掛晒起來嘅, 係意大利流行嘅乾火煺。
從樓梯影落下層。每日呢度都有好多購物者同參觀者。
呢間Luciano肉檔, 除左賣肉之外, 仲有賣好多動物嘅內臟, 連豬腳都有得賣 (因為意大利人都興食呢D野??), 啱晒中國人呢, 哈哈!!
佛羅倫斯皮革出名, 市場嘅外面有無數咁多舖頭賣皮類製品。呢條街好長, 有D似旺角女人街。雖然話係皮製品, 不過因為D貨物價錢太便宜, 我懷疑D野係咪真係皮造。
之後, 我地夠鐘入場, 參觀烏菲茲美術館 (Galleria degli Uffizi)。美術館內唔准拍照, 所以一張相都冇影到。呢間美術館被譽為 "文藝復興美術寶庫", 是意大利最大嘅一座美術館。 順便一提, 我地唔想去到先花時間在外邊排隊比錢入場 (因為據講分分鐘要排兩、三個鐘), 所以先行網上訂飛。網上訂飛 (6歐羅)需另加1.5歐羅手續費, 不過我地寧願以錢換時間。
唯一影左在美術館外眾多嘅名人像。呢位係: 意大利史上最偉大嘅詩人但丁。但丁最著名嘅作品包括"神曲" (註: 真係好好嘅作品呢)。
個人而言, 去佛羅倫斯又有時間的話, 應該去埋呢間美術館參觀。我都冇乜藝術細胞, 不過欣賞下D曠世名作, 當作提高一下本人極低嘅文化水平啦, 哈哈。
在美術館內欣賞左兩個鐘左右, 出番外面, 仍舊人頭湧湧。Piazza della Signoria (領主廣場)上亦有件大衛像, 不過亦只係複製品。真個件大衛像在佛羅倫斯 "Accademia"美術館裡, 不過此行並無參觀。
值得參觀嘅名勝實在太多, 當中當然包括以下美麗嘅建築物:
Basilica di Santa Maria Novella (洗禮堂)
Duomo ~ Santa Maria del Fiore (主教堂 ~ 百花大教堂)
呢間唔記得係咪 "喬托鐘塔" (Campanile di Giotto)... 邊位知道請告知本人。
日間嘅Ponte Vecchio (舊橋), 亦都非常美麗。下一張係條橋嘅近鏡, 見得到橋上有不少民居。住在此環境清幽之地, 真係命都長D。
意大利大城小鎮裡都有不少超迷你又可愛嘅私家車, 每次見到呢D車, 我都諗, 究竟個車主點樣 "捐"入去開車呢???
~~ 穿梭意大利2008 ~~ 待續 ~~
No comments:
Post a Comment