葡萄牙之旅 11 - 遊 Alcobaça

繼續葡萄牙之旅

今日嘅旅程, 繼續係一日行走兩個城市 - 早上我先由根據地Lisbon (里斯本)搭巴士去 Alcobaça作半日遊 (下午就會係去Nazaré)。

本來想在網上找有Alcobaça呢個 location 嘅map, 但係實在太難搵, 搵來搵去都搵唔到, 以下呢個lonely planet嘅葡萄牙地圖裡, 左手邊沿岸有個城市叫做Nazaré, Alcobaça就係在Nazaré 附近, 而我呢一日去完Alcobaça之後, 就繼續坐巴士過Nazaré 玩下半日的。

今朝早又要晨咁早出發!  我真係懷疑葡萄牙巴士公司係痴線架!  唔知點解要將d巴士班次安排得咁奇怪!  攪到我放假去旅行, 每日仲早過我平時返工好多!!

今朝出發時, 天氣似乎幾ok, 但係架coach bus行左唔夠15分鐘, 就開始見到遠處有黑雲蒲頭喇, 真係好驚兼極度掃興!!

黑雲當道.....嘩, 不過我突然間被遠處嘅另一些物件吸引住.......唔知大家見唔見山頭上好多野呢??

就係風力發電嘅.....嘅乜鬼, 我唔識叫佢地個名, 同南丫島那些一樣的東西, 呢度成個山頭都係呀, 好壯觀呀!!!!!!!!! ....個天黑得好嚇鬼, 我真係驚去到Alcobaça時係落大雨, 咁就慘!

搭左一個幾鐘頭巴士, 終於到達Alcobaça喇, 雖然仍然黑天黑地, 不過好彩冇落雨, 算好喇, 因為葡萄牙嘅冬天經常落大雨, 我每天都懷著不安嘅心情出發去玩, 個種滋味真係難以形容! (哈哈哈)

由於去到Alcobaça, 都未到10am, 太早舖頭 & 景點仍未開門, 我又好肚餓, 所以先去食個早餐先。

以下兩個葡萄牙甜品及一杯 capuccino. 左手邊那個甜品如果冇錯的話, 係叫 "sonho", 右手邊那件我唔記得叫乜名, 但呢件甜品真係甜到嘔!!  痴線, 真係太甜, 甜到離晒譜!  我唔用capuccino沖淡下的話, 會更難頂!  我印象中呢件件係我在葡萄牙食咁多野食以來最最最甜嘅食物!!!

 

本來我想去Alcobaça呢個地方之餘, 再去埋另一個小城Batalha, 但時間實在有限, 而呢兩個小城都係各有一個好出名的大教堂, 為免太重複, 又參考過幾本旅遊書嘅意見, 最後唯有取Alcobaça而捨Batalha, 下次再去葡萄牙的話, 一定去Batalha玩的

食左早餐之後, 就慢慢搵路行入市中心嘅大教堂 & 修道院。只係數分鐘嘅路程, 加上天氣算ok, 冇落雨, 所以唔辛苦。

Alcobaça嘅大教堂 (Cistercian Monastery of Santa Maria)係全葡萄牙最大嘅教堂, 擁有巴洛克式嘅正面外觀, 但內裡就係哥德式嘅建築。

 

葡萄牙嘅第一位國王Afonso Henriques, 在摩爾人 (The Moors)嘅手中奪回附近嘅城市Santarém 之後, 就在1178年開始在Alcobaça建造呢座大教堂。

裡面除左有不少雕塑外, 當然唔少得葡萄牙嘅azulejos (磁磚)啦, 如果你都同我一樣咁迷戀azulejos的話, 呢度你應該會好鐘意, 因為呢度有好多由美麗嘅azulejos砌成嘅圖。通常好多呢d大圖係有意思的, 例如係刻畫打仗時嘅情景, 相當迫真。

 

 

左圖係修道院裡嘅大教堂, 教堂非常深長寬闊, 兩邊有巨大嘅柱廊 , 氣勢迫人!  教堂內部少了華麗嘅裝飾, 卻有柔和嘅燈光, 配以白色嘅牆身, 令人感覺舒服和諧。

右圖係修道院裡嘅迴廊, 印象中呢間修道院裡面好多類似嘅迴廊。

 

下面右圖係修道院裡嘅大厨房, 個厨房最出名之處在於呢個超級無比大嘅煙囪!!

 

修道院裡有一個Refectory (飯廳)。

修道院裡另一個重點要去欣賞嘅地方係: Tombs of Dom Pedro and Ines嘅靈柩。呢兩個靈柩雕刻得極之繁複細緻, 個人極度欣賞當年工匠們嘅精美手工。呢兩個靈柩背後埋藏着一個悲傷嘅愛情故事, 詳細請去睇Alcobaça Monastery 。

 

我影嘅相, 唔知吸唔吸引到各位去Alcobaça呢?  如果想更清楚欣賞Mosteiro de Santa Maria de Alcobaça, 可以去以下嘅網頁睇睇, 網主放在好多張教堂嘅相, 影得非常美麗的。
http://www.paradoxplace.com/Photo%20Pages/Portugal/Alcobaca/Alcobaca.htm

另外, youtube都有一個video clip, 簡單介紹呢個修道院, 奈何youtube唔准我放條片上blog, 所以唯有放條link在此, 有興趣嘅話可以去看看, 可以動態地欣賞一下呢間在1989年已經被聯合國UNESCO定為世界遺產地方 (World Heritage Site)嘅美麗修道院 & 大教堂。
http://www.youtube.com/watch?v=w1eRnfodf-g&feature=channel


下回將會講嘅係另一葡萄牙小城Nazaré !!