葡萄牙之旅 2 - 里斯本的聖誕燈飾

此行嘅第一個落腳地係里斯本 (Lisbon), 亦即係葡萄牙嘅首都。雖然里斯本面積唔係話極大, 但係由於我想去參觀同欣賞嘅景點實在太多, 所以時間根本唔夠用。

本人最喜歡嘅節日係聖誕節, 加上葡萄牙好重視呢個節日, 所以節日氣氛都好濃厚, 街上嘅聖誕燈飾都好靚, 我都影埋影埋唔少相呢。

 

 

 

 

連商場都裝飾得好豪好靚呀!! 

 

聖誕去歐洲旅行當然充滿聖誕氣氛, 但係就同時會遇上一個難題, 就係當地店舖會好多日都唔營業, 旅遊景點亦會關閉!  亦因為呢個關係, 我聖誕日25號只可以搵D唔駛入場, 可以在戶外影相嘅景點參觀；同埋可以參觀一下聖堂、教堂, 因為呢D地方一定會在呢個節日裡繼續開放, 舉行彌撒。雖則教堂及聖堂仍然開放, 但開放時間就明顯減少, 可能只會開一個上午或下午少部分時間, 呢一點旅客就要注意。

里斯本市有一棵全歐洲最大嘅聖誕樹 (係人造), 而且在2005年入左健力士世界大全, 成為 "Europe's Tallest Christmas Tree"。 呢棵聖誕樹本來在2004年開始, 都在聖誕節 (大約11月頭開始), 就擺放於里斯本市中心嘅Praca do Comercio (Commercial Square), 但在2007年, 聖誕樹搬左去葡萄牙第二大城市波圖 (Porto)擺放。到第二年, 即係2008年, 聖誕樹回歸返到里斯本, 但當局將呢棵巨型聖誕樹移左去比較遠嘅 Edward VII Park呢個公園擺放。又因為公園在里斯本國際機場嘅飛機飛行範圍附近, 聖誕樹不能太高, 妨礙飛機飛行, 所以據我嘅葡萄牙朋友所講, 依家呢棵聖誕樹冇以前擺放在 Praca do Comercio (Commercial Square)那棵咁高大!! 

上一篇: 葡萄牙之旅 1 - 認識葡萄牙

穿梭葡萄牙之旅 2009/10 - 待續