Funchal 市中心其實唔大, 所有地方都可以行得到, 無需要坐巴士, 除非係住在 hotel zone一帶。一朝早我從酒店行過去Jardim de Santa Catarina (Santa Catarina公園)參觀。呢個公園其中最值得參觀, 係因為從公園高處可以俯瞰 Funchal海港嘅優美景色。
公園正門入口處有一個 Henry the Navigator嘅人像。
在香港真係少見樹木, 來到 Madeira, 到處都花花草草, 令人心情都特別輕鬆愉快。據講有唔少花、草以至水果乃Madeira獨有, 加上四季氣候宜人, 適合植物生長, 所以整個 Madeira 就好似一個公園島!!
由於 Madeira係一個島, 四面環海; 而 Funchal位處島嘅南部, 依靠海岸, 平常沒事做, 食飽飯去海邊行行, 認真夠爽呢!
海邊有一D cafe、食店, 其中呢間售賣嘅係 Madeira傳統小食 "Bolo do Caco", 係一種有 garlic butter + 香草嘅麵包, 見到就突然醒起, 我嘅葡萄牙朋友一早同我講定, 去到Madeira一定要買 Bolo do Caco來食! 我買嘅個份就有埋火退, 味道真係好好, 記住要趁熱食, 就至正至有風味
! 
食住份 Bolo do Caco, 在海邊慢慢行, 感覺超爽, 簡直可以完全忘記香港嘅一切! 繼續行, 因為下一站我要去登山 (Monte)! Funchal有登山纜車坐, 山上有幾樣事情等住我去做呀! 哈哈哈!
今日天氣勁好!! 風和日麗, 陽光普照。
大約15分鐘嘅纜車旅程, 沿途盡瞰 Funchal市內紅磚頂屋、半山田野、同埋遠遠嘅大西洋, 風景當然又係一絕啦。
坐完纜車, 一出就有幾個景點唔想錯過。
Monte山上我首先去呢個 Nossa Senhora do Monte (church) 參觀一下先。Church裡安置左國王 Charles I of Austria, 但因為時間關系, 我冇入內參觀。據旅遊書所講, 每年8月15日, 虔誠嘅教徒會跪爬呢條長樓梯上到church, 朝拜church內之聖母像。(別忘記不少葡萄牙人都係非常虔誠嘅天主教徒)
跟住我就要玩呢個 Madeira Island 最出名嘅玩意 - Toboggan Run!! 排隊付錢後, 你會順序坐一架竹車, 由兩位車夫 (carreiros / toboggan drivers) 推你落山! 呢個推落山嘅玩意勁好玩呀, 兩位車夫唔知點解咁好力, 又唔知對鞋 "雙"左乜咁滑, 可以推住我同車內另一位成員, 快速滑行落山, 足足 2km!!! 好刺激好特別好得意呀! 個人極度推薦呢個玩意。
之不過....... 被推落半山之後有一個麻煩, 就係點上番頭先山頂上邊呢? 因為仲有景點在上邊未睇喎。 呢度有一堆的士在等客, 但 2KM 路上番山, 竟然收 20 euros!! 痴線! 同我同行嘅一位保加利亞媽媽話唔好搭, 經過一輪智力遊戲後, 我地成功每人比左 5 euros 搭的士上番山! 哈哈! 多謝晒保加利亞媽媽幫我慳番唔少錢! (師奶講價真係唔惹少! 哈哈)
接著就去另一著名嘅公園 (Madeira 嘅所有公園真係好鬼靚好鬼綠又好鬼鳥語花香, 唔係香港維園那種公園呀) - Monte Palace Tropical Garden.
唔少得當然有葡萄牙最最最獨有嘅 azulejos (葡萄牙磁磚) 砌出嘅美麗圖畫。一入到公園, 就有一幅一幅嘅呢種畫, 描繪葡萄牙嘅歷史。
行到咁上下, 就開始見到個大公園喇! 呢個公園好大, 我在入面行左成 3個鐘。園內有橋、洞、石像、壁畫、噴泉、小湖、日式廟宇建築, 仲有一個 museum添, 真係大到神經!
我好鐘意呢個花園, 真係令我覺得自己係放緊假, 係休息緊, 放下繁囂, 享受緊呢個大自然, 而唔係話放假仲要周圍走, 周圍趕幾多日內要趕去幾多地方shopping之類。好正呀!
我去到呢個公園係咁吸靈氣呀, 吸呀吸, 吸呀吸!
行行下無情情見到有隻雞!! Oh no!!! 好驚呀
, 我唔敢行, 直至見到有遊客行, 我即刻跟住後面行。點解公園內會有隻公雞自由行咁奇嘅?? 
上完山, 落番市中心, 天氣仍然極靚。好多人坐晒在露天 coffee shops 飲下茶, 食下desserts, 好 hea。
通常如果有機會, 我去一個地方旅遊, 都鐘意去下街市行下, 因為街市係一個城市最 local 嘅地方, 最能見證當地人日常生活係點樣。 今次都唔例外, 在 Funchal 市參觀左一個都幾著名嘅街市。 - Mercado dos Lavradores。
一入街市地下那層, 右手邊入口, 左手邊有一間皮鞋店, 鞋匠親手造 Madeira嘅傳統 leather boots, boots嘅樣幾別緻幾可愛。
一樓那層除左乾貨, 就有售賣好多當地出產嘅水果, 好多係我在第二D地方 (包括香港) 從來冇見過的, 我亦都買左一D試下。D水果好好食喎, 好多果肉又好多汁!
BTW, D水果係咪全部都砌得好靚呢? 人地砌得咁靚, 香港師奶們如果來到呢度, 一定唔敢左揀右揀啦.... 哈哈哈哈哈哈!
Bacalhau (馬介休)呀!!! 正, 最經典嘅葡國食物!
Poncha 就係我之前講過, Madeira Island 嘅傳統飲品, 酒精濃度幾高, 我飲左一小杯就已經好暈, 唔知閣下酒量有幾勁呢
? 
好啦, 下集真係要講 Flower Parade!
穿梭葡萄牙意大利之旅 2011 - 待續!
No comments:
Post a Comment