今日行山旅程: Vernazza --> Manarola --> Riomaggiore --> 最後返回Vernazza
一朝早行山 (好似係大約8、9點), 原來山上邊已經有好多人行緊, 非常厲害。我地今日從我地嘅基地 ~ Vernazza ~ 火車站附近嘅山路, 沿著好清楚嘅指示牌, 行去Corniglia嘅方向。
以下張相係從Vernazza山上影番個鎮的。
之前我應該都有提到, 每一個起點處, 都會有個收飛/收費處, 有一個職員會check飛嘅, 若果你冇飛都冇所謂, 因為可以即時買張pass行山。想講個笑話比大家聽, 不過發生件事時, 我真係嚇親, 完全笑唔出。
話說在Vernazza嘅收飛處, 有個戴左個黑超嘅意大利男, 好似頗型咁 (不過戴左黑超, 個個意大利佬都係型男啦!
), 佢check左我地D飛後, 我地就向前行。之後我地就停左一段時間欣賞風景, 影相等等。冇幾耐之後, 頭先個型男走左出佢嘅收飛站, 行上左去我地企緊嘅位置 (當時我地企左係類似懸崖邊附近傾緊計同笑緊), 同我地搭嗲。大家傾左幾句 (全程意大利文, 因為佢唔識英文), 不過大家有少少講到亂晒寵, 因為我地兩個意大利文係有限公司。呢位哥仔, 問我地兩個今晚有冇野做 (???), 如果得閒就一齊食番餐飯咁話。冇所謂, 我地當識人啫, 而且最重要係可以practise一下意大利文嘛。唔知點解唔驚佢係壞人, 因為呢個鎮數埋得嗰幾百個居民, 仲要我地識得有friends係呢度人, 所以未驚過! 哈哈哈!!
不過咁....我地為免唔知佢乜頭乜路, 所以我地約佢今晚食飯地點係我地班friends工作嘅一間bar, 到時佢如果來的話, 我地有班friends睇住, 呢個阿先生做唔出D乜啦；若然佢放飛機唔出現, 我地都冇所謂 (仲好!!), 因為橫掂都係去班friends間bar度開餐醫肚的。 Sammi為左快D開始我地嘅行山旅程, 於是提議大家一齊影番張相, 跟著就可以走人。當我替佢地兩個影相時, 雙安無事。好喇, 咁我就叫Sammi幫我地兩個都影番張相啦。點知我行埋去影相時, 呢位哥仔失驚無神, 無端端抱起我! 嚇鬼死呀大佬, 企緊喺個類似懸崖邊嘅地方ga, 咪咁玩同挍飛得ga! 我幾鬼驚跌死呀!
呢個Sammi仲竟然連拍幾張我被嚇驚嘅相, 唔走來幫拖呀!! 其實我並冇諗搏大霧呢樣野, 因為一來本人長相普通; 二來我估佢係玩野, 我係唔好彩嗰個!! 不過我唔明佢無Q啦間抱起我攪乜鬼!!! 頂! 比佢嚇鬼死!如是, 我地就繼續行山之旅....沿途風景都幾靚, 又有好多古靈精怪嘅值物, 好得意。 終於, 見到Corniglia就在眼前喇!!
Corniglia鎮上嘅店舖放滿佢地嘅著名產品 ~ 當中包括好多酒。
之後行下度下, 寫下postcards, 影下相, 再relax一下, 我地就向下一個五鄉地嘅漁村進發! Next station is ~~ Manarola! 因為有少少疲勞嘅關係, 我地決定唔由Corniglia行山過去Manarola, 改而坐火車過去。
Manarola亦只係一個好細嘅漁村, 我地喺咁二行一個圈, 影下相留念, 就再度用行山嘅方法, 從Manarola行過去Riomaggiore。我地之所以呢段路程行山, 係因為呢段係出名嘅 "愛之路" (Via Dell'amore)。
從Manarola行過去Riomaggiore, 條路只係一條石屎路, 所以完全冇難度可言。 行得非常舒服 (而且天氣好清爽, 雖然呢日唔係陽光普照)
沿途景色好靚, 下面張相可以話比大家知, 我無需多講了。
叫得做 "愛之路", 當然條路要切合主題啦, 唔係點合身份呢。
好容易好快就到達Riomaggiore ~ 我地在五鄉地嘅最後一個目的地。 又窄又斜嘅路係呢條小漁村嘅特色。 而Cinque Terre同中國萬里長城唔知係咪已經連左做姐妹呢??
辛苦完一日, 終於可以返到去"老家" Vernazza喇, 好野!!! 之後, 走左落班friends嘅bar度吃餐意大利pasta先, 再加一杯 (查實係幾杯) birra Moretti啤酒。喺Vernazza已經飲左太多啤酒, 再咁攪法唔得掂, 返HK之後一定要遠離酒精呀!!
後談 ~ 嗰位在山上遇到嘅哥仔, 最後竟然冇去bar度食飯。自已約人, 又唔見人喎, 吹水怪。當晚, 我地將同佢一齊影喺架DC機嘅相 , show比其中一個當地friend睇, 佢一睇, 就已經即刻認得出個放飛機男係乜水, 仲即刻講到佢個名添...果然, 呢條村真係好細, 千祈咪係度做錯事! 個friend仲要加句, "He's a good guy!" 返到HK後, Sammi玩野, send email問呢個哥仔仲乜當晚唔出現, 我地等左佢好耐之類 (哈哈)。佢吹水話當晚突然有事所以遲到, 但一個鐘後趕到去bar已經唔見我地喎! 佢當我地係低能, 其實個晚我地坐喺間bar即至打養 (過左12點), 我地特登唔du穿佢, 希望有日班friends無意中du穿佢講大話, 哈哈哈!!
我地真係鬼得閒等佢成晚啦!!! 我地估計佢之後應該在當更時見到靚過我地嘅靚女行山客 (應該有無數咁多, 哈哈), 即刻約人夜晚食飯, 將佢之前對我地嘅承諾忘記得一乾二淨呢!!!
話說嗰晚, 又再次無情情, 豪無準備之下, 再比人抱起一次, 今次又係因為影相。真係想問下, 意大利人係咪好鐘意在影相時, 抱起人GA呢? 真係嚇驚。
明天, 就要離開Vernazza, 向佛羅倫斯 (Florence/Firenze) 進發!! 好喜歡Vernazza同整個五鄉地。 呢度嘅生活實在太寫意, 太舒服, 攪到我地兩個都懶洋洋咁, 都唔想再又搭D成日遲到OR冇到, 激到人飛彈起嘅意大利火車 (trenitalia)!! 唔想又要攞住D行李喺度死命咁趕呀！ 有番1,000幾百萬 ~~ 歐羅 (!!), 等我在意大利都靈同五鄉地過下日晨就至正喇, 哈哈哈!!!
~~ 穿梭意大利2008 ~~ 待續 ~~
No comments:
Post a Comment