2008-09球季作客球衣:
最新鮮熱辣嘅今季球衣, 剛剛昨日先在自由球奧古那邊買入。未有名同號碼, 之前想好會印摩連拿路以作支持, 但係我覺得咁耐以來, 我都好黑仔, 所以都係唔好連累Moli...點好呢? 印邊個好呢? 又唔想印唔鐘意嘅球員, 所以....另外, 我可能今季唔可以買埋件祖記主場, 因為我仲要破費買熱拿亞主、客場波衫支持Palla。今季買咁多波衫真係攪到我人都顛。
2007-08球季主場球衣:
原先我有件馬基安尼主場波衫, 帶左去都靈, 諗住搵佢簽名; 不過因為人太多, 未見到佢搵佢簽名, 就已經在混亂中跌左件衫落地都唔知道, 而且好快比人執鬼左, 激到我飛起。跟著就打左個好貴嘅長途電話返香港比奧古, 請佢幫我hold過一件新嘅, 好彩竟然仲有馬基安尼嘅字添喎, 返到香港就即刻去奧古度買過件新的 (因為趕住幾日後祖記來香港時搵馬基安尼簽名嘛)。最可惜係....原來馬基安尼真人衰到爆, 總之唔好攪咁多野啦!!!
馬基安尼嘅親筆簽名...對於我, 呢個簽名現在冇乜特別感覺囉, 唯一就係叫做有收藏價值啦。
2007-08球季作客球衣:
呢件係我珍藏中最貴重嘅, 因為有Palla嘅親筆簽名!! 件衫在球季開始前已經決定買的, 因為上年見到Palla後覺得佢實在太nice, 所以一定要印佢number以示支持!
今年四月去都靈時見到Palla, 所以搵佢在波衫上面簽左名。不過因為支筆嘅顏色唔夠深, 所以個簽名簽得唔太起眼。
到5月祖記來香港時, 又見到Palla呀! 我拿住件波衫, 同Palla講個簽名唔清楚, 點知佢搵支極之清楚嘅紅色筆, 打側件衫, 簽在個號碼上邊。而最開心同驚喜係, 佢竟然寫埋我個名同一句說話在件波衫上面添, Palla實在超好人...你話我點可以唔鐘意佢得ga!!
2006-07球季主場球衣:
雖然呢季因為電話門事件, 祖記要被降班, 不過無損對球會支持。呢季我仲印左隊長廸比亞路添。但太蠢, 竟然冇帶件衫去都靈搵佢簽名, 如果唔係一定簽得到, 依家想翻起都好後悔。
2006-07球季作客球衣:
第一次買埋作客球衣添...從此個荷包好唔掂; 而個衣櫃都呈逼爆現象!!
2005-06球季主場球衣:
我第一件買嘅祖記球衣, 喺倫敦一間體育店買嘅, 當時仲話大減價, 但後來發現都係比喺香港買貴啦....。
No comments:
Post a Comment