Part 5 - 回到都靈 (見祖記球員)

今次返都靈, 其中最重要就係睇祖記嘅一場球賽, 另外因為報左一個意大利文課程, 所以可以住在都靈一個星期。


由米蘭坐火車到都靈, 見到都靈嘅火車站就在面前, 太好喇!

 

呢日 (4月26日)到達後, 就首先一去市中心嘅祖記 Juventus Store掃貨...呢幾日因為係意大利假期, 所以都靈簡直可以用萬人空巷來形容, d旅客多得好緊要, 簡直好似去左旺角一,樣 連祖記store都迫爆!!

今次間store外面嘅poster就有隊長, Palla, 保方, 伊亞昆達同Andrade賣廣告。唔知，間store幾耐換一次poster嘅呢?

再接著就係去睇球員...... 嘩, 超多人等球員呀!!!  同上年完全唔同!!!

首先見到係Palla!  佢其實今日有d面黑黑, 不過仍然幫fans簽名.... 當時已經有傳聞佢不滿球會經常放佢做後備, 所以在對柏爾瑪場比賽 (亦係佢生日時)入左波都全無表情。唔知係咪埋伏左今日外借熱拿亞呢個決定呢? 張相嘅右手邊個人係我呀。我搵佢喺一張球隊poster同佢件波衫度簽名。而當我比張上年同佢合照嘅相佢簽時, 佢簽完後, 竟然抬高頭, 笑笑口, 比番張相我喎, 攪到我都不知幾開心 (尤其因為見佢笑番!)。

之後冇幾耐就見到摩連拿路, 佢非常友善, 我都搵佢在全隊poster度簽左名。另外就同佢合照左添。

接著就見到其它球員, 包括洛斯連奴, 比連度利, 比拿廸, 史丹達度, 仲有保方, 利維特, 斯歷咸美斯同泰亞高添。如果冇記錯, 仲有甘莫蘭尼斯, 斯素高, 柏斯基圖 (當時我認得佢個樣但醒唔起佢個名), 歷高達利。因為太多人關系, 隊長廸比亞路行左後門避人羣, 另外反而唔見當時我仲好喜愛嘅馬基安尼, 同埋查斯古特, 唔知點解....

各位, 認唔認得嗰兩個security guards呢?  佢地今次都有來香港呀...

因為太多人又混亂, 後來仲有幾個警察 (同埋一架警車)幫手維持秩序, 好誇張!!!

 

 

 

 

其實今次因為太多人, 根本冇乜機會行近d球員度, 不過好彩都零距離接觸左Palla, 摩連拿路 (Moli)等, 又搵左Palla, Moli, 斯歷咸美斯同史丹達度簽名 & 影相 (不過Palla就冇)。同上年比較, 好失望下。但幸運嘅係, 佢地跟著來香港踢表演賽, 竟然仲好容易搵到佢地一齊影相同簽名 (其中最多得就係因為我地其中幾個係祖記官方會員, 可以被邀請同球員接觸, 想番都仍然異常開心)。

~~ 穿梭意大利2008 ~~ 待續 ~~

Part 4 - 米蘭半日遊

在網上book呢間酒店時, 講到話在火車站附近, 不過原來比佢搵晒笨, 由火車站行路去酒店, 都幾遠下, 就算在火車站搭巴士都要幾個站。但好彩間酒店樣貌正正路路, 都幾乾淨。


我地住喺米蘭嘅酒店

 

因為得番半日時間, 所以在酒店check in左後, 就即刻出去市中心嘅景點。去番火車站嘅旅遊局, 諗住攞番個免費地圖添 (慳得就慳嘛)。

火車站裡面個旅遊局, 難搵到飛起, 位置重有d鬼鼠添。另外, 佢地係有成2個鐘頭lunch break, 攪到又浪費左少許時間在等呢方面。等 ~ 在意大利真係家常便飯.....好煩!

在火車站有地鐵, 搭去Duomo (大教堂) 地鐵站, 就去到米蘭大教堂同著名嘅Galleria Vittorio Emanuele II個名牌shopping center。


地鐵站內景。

先搭地鐵去Codorna站, 參觀Castello Sforzesco (史科斯高古堡), 呢個古堡係米蘭文藝復興時期嘅代表作。 當日係星期五, 又因為到達時已經過左下午兩點, 所以免費入場, 很好, 又慳番一筆!

 

 

之後再搭地鐵去Duomo (大教堂) ~ 米蘭市象徵, 係意大利第二大教堂。由於時間關系, 唔夠時間上去教堂頂個塔參觀, 是今次在米蘭最可惜之地方。

咁唯有在外邊狂影一番啦!!

 

當日 (4月25日係意大利公眾假期) 大教堂前面, 唔知有乜活動, 多人到神經, 一班又一班類似大學生嘅團體用晒大聲公大叫口號, 又寫橫額, 又fing晒旗, 又播好大聲嘅音樂。我地推算係示威或者擴議活動。

隔離好多商舖, 其中一間仲有隊長買晒廣告嘅 bliss, 間舖頭裡面賣嘅首飾都非常貴, 我當然只係睇下啦!

Duomo另一邊隔離就係Galleria Vittorio Emanuele II, 裡面大部份都係專賣名牌牌子嘅shops ~ LV, Prada.....

米蘭一帶嘅景色....

有個加卡 (Kaka) 嘅廣告牌, 應該係叫人捐錢, 因為中間個句: "Con la fame, no si gioca", 意思係, "With hunger, one cannot play"。

保方嫂賣嘅內衣廣告週圍都見到。

連大簡都要賣下廣告, 收番d錢先!  話說我走埋去影相時, 有兩個意大利男仔走番轉頭, 睇我影乜喎.... 又會咁八卦!!!

~~ 穿梭意大利 2008 ~~ 待續 ~~

Part 3 - 到達米蘭

諗住一早到米蘭後, 可以玩一日; 但依家先因為飛機cancel, 又再加埋唔見行李排左一輪隊, 浪費左超多時間。看看手錶, 已經成中午12點幾, 去得市中心, 搵得酒店黎, 都唔多駛點玩米蘭... 好彩我以前叫黎過米蘭, 我個friend就慘少少.... 不過其實米蘭冇乜好睇, 唔買名牌貨的話, d景點大半日都睇晒。

(以下部份相片係同行朋友影的)


到達米蘭!  坐架巴士由飛機轉番去機場客運大樓攪 check out手續。

 

 

 

米蘭Malpensa機場出境大堂, 冇乜特別, 有d殘舊。

坐機場shuttle bus去米蘭市中心嘅火車總站, 票價成為6歐羅, 需要成個鐘頭先去到市中心。

我地去hotel check in左之後, 講低話英航會送我地d行李來酒店後, 就把握時間去市中心景點參觀。個心 ~ 就仍然記掛住d行李。

好彩, 當我地晚上返酒店後, 發現d行李果然在大約兩點已經送到黎。本來之前諗住買定過都靈嘅火車飛, 但一日未知d行李係咪已到達, 一日都唔敢買飛; 依家收到行李, 但因為太夜, 唔敢再出火車總站, 所以唯有明早一早照離開酒店, 即買飛即上火車。

順便一提, 晚上 (過左8pm後)嘅米蘭火車站, 已經好雜下, 好多騎呢人, 所以我地唔多久留。


米蘭中央火車站外貌 (Milano Centrale)

米蘭中央火車站內貌, 舒淇個Kenzo廣告真係去到意大利邊一度都見到!

 

火車站內嘅自動售票機, 經常都有好多人排隊。

~~ 穿梭意大利2008 ~~ 待續 ~~  

Part 2 - 混亂的倫敦希斯魯機場

今次去意大利, 依舊都係坐英航。唔係佢地服務好, 只因為佢地夠平!  之前去旅行, 買機票多數都係幫襯 "學連"... 不過今次轉左幫另一間都專攪自助遊嘅 "歐6旅運", 都唔錯呀, 個男sales仲主動提出幫手睇我地個行程, 幫我地研究下駛唔駛買意大利火車証, 非常友善幫忙, 真係唔該晒!! 

自從英航從香港飛去倫敦嘅飛機全部降落在T5 (5號客運大樓)後, 就真係頗驚, 事關T5開左以來, 勁被旅客投訴 - 唔見行李係其中最為人所鬧到痴肺嘅一件事。

今次我地行程, 本來係香港 --> 倫敦 --> 轉機 --> 米蘭 Linate機場。

米蘭有兩個機場, 以 Linate機場較接近市中心, 所以在此降落當然正, 因為可以快d返到hotel, 而且搭機場shuttle bus都平d啦。

但係...人算不如天算。我地去到T5後, 機場嘅指示牌竟然話我地去米蘭班飛機已經cancel左!  吓, 咁玩我地呀!  走去BA櫃台排隊攪左一輪, 職員話會轉我地去另一班機, 除左有少許delay外, 到達米蘭嘅機場仲轉左去Malpensa添, 攪鬼錯呀!!!  離鬼晒譜, 本來一早查定晒去Linate機場去市中心嘅資料ga嘛, 依家唯有即刻拿本旅行書出來睇下有關Malpensa機場嘅資料。
(多謝我同行的朋友, 以下幾張相都係出自佢手嘅... )


到達倫敦希斯魯機場5號客運大樓

新鮮熱辣嘅倫敦希斯魯機場5號客運大樓, 新淨 + 好靚嘅設計

 

 

當中發生左一件事, 我地見到幾個意大利人在BA櫃台前用唔多好語氣鬧一個BA職員, 個職員其實本身幾helpful, 所以當比人鬧鬧貢時, 就即刻話 "你唔好鬧我呀, 唔關我事ga喎"... 其實喺呢d事情上, 我都覺得唔駛話d職員, 一來佢地都唔想, 二來對佢地惡形惡相的話, 反而佢地唔多幫你手的; 態度友善d比較有著數。個人意見同經驗。


終於可以離開倫敦, 轉機去米蘭喇 !!!!!

機上嘅snack, 因為係短途機, 所以只得個三文治同杯橙汁。

黑開的話, 又點只一件事呢....

當我地去到Malpensa機場時, 去攞行李....心一直想, 死啦, 頭先班機被cancel, 轉左坐第二班機, 會唔會d行李轉唔切呢???

大大鑊, 行李輸送帶得個行李三幾件... 我地d行李真係好唔好彩, 仲喺倫敦!  於是乎, 我地又要排隊, 問我地d行李點搞法.... 排我地附近一位葡萄牙男士同我地講, 佢一個禮拜內喺T5唔見左兩次行李! 佢之前幾日由葡萄牙經倫敦 (T5)去香港公幹時, d行李被留在倫敦; 今次由香港返葡萄牙經倫敦 (T5)時, d行李又被留在倫敦!  你話發唔發神經!

隊 ~ 得個幾個人排, 但d意大利員工嘅效率真係 "冇得頂"!!!  慢到嘔電..... 終於輪到我地, 個職員話我地嘅行李大約在下午2時左右, 會送到返我地酒店... 都唔知信唔信佢好, 我地第二朝要搭早上火車過都靈ga, 所以好心急, 驚唔知幾時先見番d行李。

註: 個T5得個大字, 唔知要咁大做乜; 條條路鬼死咁長, 又上行人電梯, 又落行人電梯, 又搭冇人駕駛列車, 轉來轉去, 真係行都行到腳軟....


~~ 穿梭意大利2008 ~~ 待續 ~~  

Part 1 - 離晒大譜嘅拿波里B&B!

上個月去完意大利旅行返來, 因為太多野攪, 所以都係攪到尋日先張d相整理好放上Facebook比d朋友睇。

本來我地個行情好長:
米蘭 - 都靈 - Modena - 帕爾瑪 - 都靈 - 熱拿亞 - Cinque Terre - 佛羅倫斯 - 比薩 - Lucca - 錫耶納(Siena)-Assisi-巴里 (Bari) - Alberobello - 拿波里 - 羅馬

但去到個行情嘅一半, 即係在佛羅倫斯時, 我地已經開始頂唔順去咁多地方。雖然我地都好想繼續南下, 尤其是我地好想去Bari同Alberobello, 但想過度過後, 我地決定: 去完錫耶納後, 唔再南下, 但就掉番轉頭, 再北上!!  都幾神經, 因為我地竟然重複去番都靈同Cinque Terre!

由於決定再返都靈同Cinque Terre, 我地要立刻cancel之後行情plan好去嘅地方嘅住宿; 而同一時間, 又要即刻做兩件事 ~ 打電話比我在都靈嘅朋友, 問可唔可以在佢屋企住4晚 (真係嚇鬼死佢啦!); 又要send message比我地在Cinque Terre個friend, 問佢可唔可以幫我地book兩晚當地嘅hostel住。都靈個朋友一口就答應絕無問題 (太好喇, 唔該晒佢); 而在Cinque Terre嘅朋友亦好幫手, 幫我地book左地方住 (又唔該晒), 欠落一街人情添....


再回到都靈 ~ 太好喇, 一個令我好有歸屬感嘅地方! 

再回Cinque Terre (五鄉地), 因為呢度景色真係非常優美寧靜, 好寫意嘅生活, 攪到我幾唔想走添... 

點知尋日, 我個一齊去旅行個friend, email我, 講個晴天霹靂嘅消息我知, 佢話拿波里間B&B竟然過左佢張信用卡一晚住宿嘅卡數! 

事緣在網上訂hostel/ B&B房, 多數都要你比低信用卡號碼同有效日期作實 (但就唔會過你數, 除非你book左房又失左蹤唔出現, 佢地先會過你一晚房租嘅卡數; 但絕對係有cancellation policy的); 朋友一早已經email間B&B, 通知佢地我地要cancel個booking, 但係佢地一路都冇回覆喎, 但我朋友冇佢地電話號碼, 所以打唔倒比佢地, 但諗住應該冇問題掛...

我朋友收到呢間B&B收鬼左我地錢單野後, 激氣到爆, 即刻send左個email過去炮轟佢地! 邊知, 間B&B竟然話佢地係冇cancellation policy!!  我真係第一次聽到話有 hotel/hostel/B&B冇cancellation policy, 咁咪即係有佢著數得我蝕底?  book房但唔比人cancel, 照收人錢?  攪鬼錯!  旅客book住宿, 但隨時可能因為行情改變或其他原因而需要cancel住宿, 其他大型網上訂酒店嘅網站, 都有 cancellation policy....最"正"係佢地reply我個friend嘅email, 請先看我朋友寫比間B&B嘅回應:

Dear Nicola,

Thanks for letting me know that your B&B does not have a cancellation policy. But why can I find 72 hours cancellation policy on website like "hostelworld.com"?

Also, would you please explain why didn't your B&B reply my email when I want to cancel the booking, and inform me in advanced that due to there is no cancellation policy, one night room fee would be debited from my credit card?

Grazie mille,
xxxxxxxxx (我個friend個名)

然後又睇下佢地點reply我個friend吖:
xxxxxxxxx (我個friend個名):

web site hostelworld 72 hours cancellation policy
web site hostelbookers 48 hours cancellation policy
web site venere 24 hours cancellation policy
my web site don't have the cancellation policy
regards
太好, 原來你有d同別人與眾不同, 人所不知嘅揾人笨條款, 咁我一定要公諸於世喇, 唔好等第二d人 (尤其係自已人 ~ 香港人)再比人揾老襯!

Bed and Breakfast Firenze 32, Napoli

間B&B, 就在拿波里火車站附近, 就係因為見佢咁就腳, 咪book佢囉, 估唔到係....
受過教訓, 以後一定要醒醒目目, book房一定第一時間要問清楚佢地嘅cancellation policy, 呢樣野好重要。