羅馬好風光 ~ 之三

各位...你地冇睇錯野, 我依家的而且確講番我2007年嘅羅馬之旅!  哈哈哈, 我覺得做人要有頭有尾, 講講下羅馬冇左尾唔係太好, 而且, 當對自己旅行一個好回憶都好。

當時我去羅馬兩星期, 諗住有咁多時間, 應該一定可參觀晒所有大小景點, 點知原來..羅馬真係實在好大, 而景點亦太多, 再加上我每日早上都要上堂, 只得個下午得閒, 所以就算有兩星期, 到走喇, 都仲有好多景點冇去到。

去到羅馬第一個下午, 我首先就係去: Museo Nazionale Romano (國立羅馬博物館)參觀。呢次去羅馬真係好彩, 撞正羅馬文化週 (Roman Cultural Week), 所有景點免費入場, 所以首先已經省回我...6 euros! 開心到我飛起。.

Museo Nazionale Romano就係羅馬總火車站 (Stazione Centrale Roma Termini)旁嘅巴士總站對面, 所以好易搵。由於雕像及其他作品實在太多, 所以要用頗多時間欣賞。以下係部份館內大作。


圖左: Statue of Augustus (羅馬的第一位皇帝)嘅雕像

圖右: Wounded Niobid (受傷的尼歐碧德), 雕像創作於440BC, 根據旅遊書所講, 此雕像本來用於一座希臘寺廟內, 但後來落入凱撒 (Julius Caesar)手中。




圖左: Discus Thrower (擲鐵餅的人), 係公元2世紀嘅大理石雕像。此像係仿照450BC希臘Myron嘅作品。
圖右: 唔記得佢係乜東東銅像... sorry....





博物館內有好多勁靚嘅mosaics (馬賽克), 如果你都喜歡馬賽克, 相信你都會對呢個地方好有好感, 會睇到唔捨得走呢...



穿梭羅馬2007之旅 ~ 待續

羅馬好風光 ~ 之2

繼續在羅馬嘅遊覽....


個噴泉係咪好靚呢?    呢個噴泉亦係Bernini所建造, 位於Piazza Barberini。 之前我搵左好耐都搵唔到佢, 點知有一日無意中落車時見到喎, 好彩, 都算同佢有D緣份, 哈哈哈!!





另一個我planned左一定要去嘅景點 ~ Santa Maria del Popolo (人民聖母堂), 呢個聖堂擁有文藝復興嘅巨人: Raphael & 卡拉瓦喬 (Caravaggio) 嘅名作, 入場亦都係免費嘅....值得去參觀呢。

之前或許大家都聽我講過, 我喜歡 Caravaggio , 其實我都鐘意 Raphael, 不過個原因可能好神經.....因為佢同Palla個 first name差唔多!  痴線, 神經病!!!

Santa Maria del Popolo地點非常好, 出地鐵站 (Metro: Flaminio) 行幾步就到, 好方便。穿過呢個 gate就係聖堂所在地。




面對住聖堂有個宏偉大廣場 (Piazza del Popolo), 又有方尖碑!    呢個方尖碑係在羅馬最古老嘅方尖碑 (有3,200年歷史!), 係從埃及Heliopolis運來,原本係紀念法老王 Rameses II (拉美西斯二世), 後來被 Augustus攞左來羅馬。

以前, 呢個廣場係公開舉行死刑嘅地方。





Santa Maria del Popolo聖堂嘅正門入口。大家鐘唔鐘意坐樓梯嘅呢??  我在HK時係唔會坐樓梯, 但去到意大利, 日行夜行, 真係行到腳軟, 所以好多時, 唔理咁多, 倦就坐樓梯休息下, 我行完呢個聖堂後, 都坐左係呢個樓梯休息, 對住個大廣場, 感覺好舒服呢。





講番個聖堂, 內部裝飾得好靚, 不過記憶中, 聖堂內都幾暗。





Caravaggio嘅名畫: Crucifixion of St Peter (聖伯多祿被釘十字架) ~ 1601




Caravaggio嘅另一幅名作都收藏在呢個聖堂內, 就係: Conversion of St Paul (聖保祿的皈依) ~ 1601





除左 Caravaggio嘅作品, 仲有Raphael, 同埋 Pinturicchio嘅作品都在呢個聖堂找得到, 不過因為聖堂實在好暗, 唔方便經常用閉光燈影名畫, 所以只有用眼睛看, 用腦記住。

去完Santa Maria del Popolo聖堂後, 我就過去羅馬另一著名景點參觀。

聖天使堡 (Castel Sant'Angelo)



都係多得羅馬市嘅 Roma Cultural Week, 去參觀聖天使堡1蚊都唔駛, 慳番筆!!

從聖天使堡頂往下看, 可以清楚睇到羅馬市好多景點, 包括 the Vatican, Trastevere (越台伯河), 下面條橋就係橫誇越台伯河去聖天使堡嘅 Ponte Sant'Angelo, 呢條橋建於 133-134年, 好古老!!








羅馬市嘅地鐵, 真係又污糟, 又舊。graffiti 在歐美地區好流行, 連地鐵車卡都被畫到鬼咁!!  查實我都唔明佢地點有時間畫晒成架車卡.....不過講真, 又真係畫得幾靚 (合唔合法另一回事啦)。羅馬地鐵只得兩條線, 有一條線嘅車仲要係: 冇冷氣!!!  我經常坐地鐵坐到一身汗, 仲差D缺氧!!

地鐵雖然自出自入, 不過佢地嘅突擊檢查好多。本人係怕死一族, 所以從來未試過唔比錢搭車 (sorry.....except....有一次在Florence迫於無耐, 不過驚到死死下)。如果被捉到冇買飛搭車, 要罰好多錢 (好似 50euro)....冇為以身犯險吖, 去得旅行, 買張機票都幾千元, 點解要慳個10元八塊....個個都想唔比錢搭車, 咁人地點做生意呢? 







去埋呢度添呀......真理之口 (Bocca della Verita')!!  好彩, 我隻手冇被夾住!!!  哈哈哈!!!
當日鬼咁多人排隊同個口合照, 我排左成半粒鐘呀!!!





仲有被稱為結婚蛋糕嘅: Palazzo Venezia. 據旅行書所講, Mussolini (墨索里尼) (意大利獨裁者)曾經在呢個皇宮嘅露台上, 鼓勵群眾擁護法西斯主義。我當日去到時, 個Palazzo正在裝修中。




穿梭羅馬 2007 ~ 待續

羅馬好風光 ~ 之1

繼續我呢個羅馬嘅旅程...(雖然都已經係2007年5月嘅事囉) ... 留在羅馬兩星期,  仲要所有景點免費入場, 可以有排我 "磨" la!! 


Piazza Navona

我估羅馬嘅旅客, 普遍會去呢度睇下行下, 事關呢個行人專用廣場好出名。當時我 host family個意大利媽媽都叫我要去, 我去左囉。意大利媽媽話佢得閒出開去羅馬市中心, 都會坐在Piazza Navona休息下, hea下。

這個四河噴泉 (Four Rivers Fountain) 位在廣場中央。呢座大師Bernini嘅作品, 四條河代表嘅係: 恆河 (Asia), Danube (多瑙河, Europe), 普塔河 (America, 本人唔識), Nile (尼羅河, 非洲).....點解冇中國條黃河嘅?







一般歐洲廣場上會見到嘅事情 ~ 畫畫.... D畫真係畫得好似又好真。冇錢買, 屋企亦冇位放, 所以欣賞完可以走人...哈哈哈。





這間 ~ 鼎鼎大名嘅 Tre Scalini 咖啡館, 據旅遊書所講, 係歷史悠久嘅咖啡店, 最出名係佢地嘅 gelati。舖頭就在Piazza Navona廣場旁邊。





又話到佢地個 "自製朱古力松露雪糕球" 幾著名幾好食, 於是走入去買左來試試。呢位侍應先生, 見我係黃皮膚人, 大家傾兩句。你估佢邊個國家嘅人來嘅????





呢個咁嘅貴到死雪糕, 我都食唔出佢味道有幾驚為天人....我攞住呢 "壇"野, 坐在廣場嘅櫈上食, 未食到一半佢開始溶, 攪到我 "呢晒hea"... 剛才位侍應, 係來自 Bangladash (中文係咪叫 "孟加拉"?)。 嘩, 估唔到咁遠來到意大利搵食.... 聽講Bangladash係亞洲最窮困嘅國家, 生活非常艱苦, 出國搵食相信係當地人脫貧嘅比較可取嘅方法之一, 希望佢地可以搵多D錢幫助到家鄉嘅親人啦。





從Piazza Navona轉幾轉, 轉到來呢處: Pantheon (萬神殿)。萬神殿建築宏偉, 面前仲有一座方尖碑。 萬神殿係免費入場, 所以更加吸引遊客。





據書所講述, 羅馬皇帝 Augustus嘅女婿 Marcus Agrippa在 27B.C.建造此寺廟, 到118-125年 (A.D.), 當時嘅業餘建築師 Hadrian皇帝再重建而成。下面相中嘅刻字就係Hadrian紀念Agrippa。





萬神殿其中最宏偉之處係巨大嘅柱廊 (總共有16根花崗柱), 另外仲有那道勁厚又大嘅鋼門。






萬神殿另一特色, 係呢個圓頂。歐洲最寬嘅石造圓頂, 高度同寬度都係 43.3公尺。呢個天頂看到出面個天空, 當時我見到有幾隻鳥飛過!! 





萬神殿內部好寬敞, 擠滿訪客, 噪到不得了!!!  救命!!!  意大利周圍都鬼死咁噪!!





離開萬神殿後, 又再周圍轉。轉到來呢個地方, 唔知係甚麼政府建築物。然後經過 Colonna di Marco Aurelio, 之後再 "遇上"一個方尖碑。羅馬都真係頗多方尖碑 (不下於埃及)。






把握時間, 周圍行周圍睇.....跟著來到嘅係: 無人不識嘅許願池 (Fontana di Trevi)。未行到許願池, 離遠已經被巨大嘅噴泉水聲響所吸引。許願池池水非常清澈, 浮雕刻得美麗細致, 而且建築物本身好潔白, 相信有關機構應該經常清洗表面。 順便都要掉個硬幣落去, 唔返來羅馬唔緊要, 最緊要可以返到來意大利 (特別係Torino就得架喇), hahaha...





羅馬有無數噴泉, 齋行去唔同地方欣賞噴泉都有排行, 有排搵。
位在 Piazza Barberini嘅 Triton Fountain (Fontana del Tritone// 海神噴泉), 係大師 Bernini嘅另一傑作。




至於在  Piazza della Repubblica 廣場嘅 Fountain of the Naiads (仙女噴泉), 係一個size極大嘅噴泉, 佔據在馬路中央嘅 roundabout。Piazza della Repubblica在羅馬 Termini火車總站附近, 就算步行過去都好快到達。





由於相片同埋去過嘅地方極多, 下回繼續....

穿梭羅馬 07 ~ 待續