羅馬好風光 ~ 之1

繼續我呢個羅馬嘅旅程...(雖然都已經係2007年5月嘅事囉) ... 留在羅馬兩星期,  仲要所有景點免費入場, 可以有排我 "磨" la!! 


Piazza Navona

我估羅馬嘅旅客, 普遍會去呢度睇下行下, 事關呢個行人專用廣場好出名。當時我 host family個意大利媽媽都叫我要去, 我去左囉。意大利媽媽話佢得閒出開去羅馬市中心, 都會坐在Piazza Navona休息下, hea下。

這個四河噴泉 (Four Rivers Fountain) 位在廣場中央。呢座大師Bernini嘅作品, 四條河代表嘅係: 恆河 (Asia), Danube (多瑙河, Europe), 普塔河 (America, 本人唔識), Nile (尼羅河, 非洲).....點解冇中國條黃河嘅?







一般歐洲廣場上會見到嘅事情 ~ 畫畫.... D畫真係畫得好似又好真。冇錢買, 屋企亦冇位放, 所以欣賞完可以走人...哈哈哈。





這間 ~ 鼎鼎大名嘅 Tre Scalini 咖啡館, 據旅遊書所講, 係歷史悠久嘅咖啡店, 最出名係佢地嘅 gelati。舖頭就在Piazza Navona廣場旁邊。





又話到佢地個 "自製朱古力松露雪糕球" 幾著名幾好食, 於是走入去買左來試試。呢位侍應先生, 見我係黃皮膚人, 大家傾兩句。你估佢邊個國家嘅人來嘅????





呢個咁嘅貴到死雪糕, 我都食唔出佢味道有幾驚為天人....我攞住呢 "壇"野, 坐在廣場嘅櫈上食, 未食到一半佢開始溶, 攪到我 "呢晒hea"... 剛才位侍應, 係來自 Bangladash (中文係咪叫 "孟加拉"?)。 嘩, 估唔到咁遠來到意大利搵食.... 聽講Bangladash係亞洲最窮困嘅國家, 生活非常艱苦, 出國搵食相信係當地人脫貧嘅比較可取嘅方法之一, 希望佢地可以搵多D錢幫助到家鄉嘅親人啦。





從Piazza Navona轉幾轉, 轉到來呢處: Pantheon (萬神殿)。萬神殿建築宏偉, 面前仲有一座方尖碑。 萬神殿係免費入場, 所以更加吸引遊客。





據書所講述, 羅馬皇帝 Augustus嘅女婿 Marcus Agrippa在 27B.C.建造此寺廟, 到118-125年 (A.D.), 當時嘅業餘建築師 Hadrian皇帝再重建而成。下面相中嘅刻字就係Hadrian紀念Agrippa。





萬神殿其中最宏偉之處係巨大嘅柱廊 (總共有16根花崗柱), 另外仲有那道勁厚又大嘅鋼門。






萬神殿另一特色, 係呢個圓頂。歐洲最寬嘅石造圓頂, 高度同寬度都係 43.3公尺。呢個天頂看到出面個天空, 當時我見到有幾隻鳥飛過!! 





萬神殿內部好寬敞, 擠滿訪客, 噪到不得了!!!  救命!!!  意大利周圍都鬼死咁噪!!





離開萬神殿後, 又再周圍轉。轉到來呢個地方, 唔知係甚麼政府建築物。然後經過 Colonna di Marco Aurelio, 之後再 "遇上"一個方尖碑。羅馬都真係頗多方尖碑 (不下於埃及)。






把握時間, 周圍行周圍睇.....跟著來到嘅係: 無人不識嘅許願池 (Fontana di Trevi)。未行到許願池, 離遠已經被巨大嘅噴泉水聲響所吸引。許願池池水非常清澈, 浮雕刻得美麗細致, 而且建築物本身好潔白, 相信有關機構應該經常清洗表面。 順便都要掉個硬幣落去, 唔返來羅馬唔緊要, 最緊要可以返到來意大利 (特別係Torino就得架喇), hahaha...





羅馬有無數噴泉, 齋行去唔同地方欣賞噴泉都有排行, 有排搵。
位在 Piazza Barberini嘅 Triton Fountain (Fontana del Tritone// 海神噴泉), 係大師 Bernini嘅另一傑作。




至於在  Piazza della Repubblica 廣場嘅 Fountain of the Naiads (仙女噴泉), 係一個size極大嘅噴泉, 佔據在馬路中央嘅 roundabout。Piazza della Repubblica在羅馬 Termini火車總站附近, 就算步行過去都好快到達。





由於相片同埋去過嘅地方極多, 下回繼續....

穿梭羅馬 07 ~ 待續  

Part 4 ~ About the Rome Cultural Week (有關羅馬Cultural Week)

就有關羅馬 Cultural Week (意大利文: Settimana della Cultura) 嘅問題, 雖然當地朋友, 以至我 host family, 同埋學校嘅老師們都比唔到答案係咪每年都舉行, 但網上搵資料後發現, 應該至少近兩年都有舉行過。

我2007年時, 好幸運咁啱碰正 Cultural Week舉行, 所以大部份文化館入場費都免...但可能每年嘅舉辦時間都有所不同。

在網站 http://rome.wantedineurope.com/news/news.php?id_n=4271 所介紹, 剛過去嘅2008年, 羅馬 Cultural Week係在 25-31 March 2008舉行!   而我在 2007年, Cultural Week 是在 12-20 May 2007舉行, 足足差成個半月..... 因此如果你打算今年去羅馬玩, 又想慳番一筆錢, 可以嘗試夾下時間, 睇下今年 Rome Cultural Week幾時舉行, 再plan你嘅旅遊行程。(註: 據說今年嘅舉行時間仲未決定)
我個人覺得, Rome Cultural Week真係可以幫你慳番好多錢, 而且因為唔駛排隊比錢入場, 連排隊時間都慳番, 直入呀 (當然有時都會視乎你嘅入場時間係唔係 peak hours)。

************************

以下文章摘自 http://rome.wantedineurope.com/news/news.php?id_n=4271, 有興趣找尋多D有關Rome Cultural Week資料的話, 可以留意。

Culture: Culture Week 2008.
Tuesday, March 25th 2008 www.beniculturali.it

This year the annual week of culture organised by the ministry for culture takes place from 25-31 March. During the event all state-run museums, galleries, monuments and archaeological sites across the country are open to the public free of charge and numerous exhibitions, performances, guided tours and other initiatives have also been organised for the occasion.

For a full list of events by region see the culture ministry website www.beniculturali.it. There is also a freephone information number tel. 800991199.

In Rome as in past years city council-run museums and galleries such as the Capitoline Museums, Trajan’s Markets and the Ara Pacis Museum are also taking part in the initiative. For a full list of participating sites see www.museiincomune.it or contact the city council culture and tourism hotline 060608.

Part 3 ~ 羅馬送我大禮!

近日有位blog友問起我2007年在羅馬遊學時嘅一D細節, 令到我又再記番起我個 "穿梭羅馬07" 寫左兩篇就停左添。趁仲有D記憶, 就不如趁呢排冇乜第二D野講, 回憶番先。在羅馬停留左兩星期, 主要因為學意大利文。我上課時間係逢星期一至五, 9am-1pm, 其餘時間, 我就用盡佢黎參觀羅馬市嘅不同名勝。
雖則話有兩星期時間, 但其實都係唔夠睇清楚羅馬的.......我係咪講得太誇張呢?  一D都唔係, 羅馬實在太多野睇, 加上每日只得半日玩, 時間好趕。兩個星期過去左, 仍然有不少景點係我唔夠時間, 而冇去到的。
有一樣東西不得不提, 何解我這篇blog的題目係: 羅馬送我大禮?? 
咁係因為: 我去到羅馬時, 發現一樣好開心嘅事, 就係我碰正羅馬市嘅 Cultural Week, 所有文化場所嘅入場係: 免費!!!!!!
簡直唔相信有咁大著數出現, 因為在意大利, 參觀景點絕大多數係要比入場費的, 而且好多時仲係幾貴。





我在羅馬停留時間係: May 13 to May 26, 咁即係話, 我完全可以用盡呢個Cultural Week嘅著數, 真係發大達, 唔係講笑, 大大話話慳左我40、50 euro, 因為計一計數, 淨係入 "羅馬鬥獸場 (Colosseo), 都好似要 13 euro。
所以今次在羅馬兩星期以來, 每日都忙到飛起, 一落堂第一件事係....走人, 是但搵個地方食午飯, 然後就去本來要比錢入場嘅地方參觀。
我首先發現原來唔駛錢參觀文化場所, 係在第一日落堂後去參觀:
國立羅馬博物館 (Museo Nazionale Romano) ~ 去cloakroom放低隨身物件時, 那位友善嘅女職員話我知有個 Cultural Week ~~ 哈哈, 最記得呢個回合, 慳左我 4 euro!!!  正!!! 
扮有文化嘅Ta....依照帶在身那本 "TOP 10羅馬" 旅遊書所介紹, 於館內周圍睇, 周圍影一餐 (唔駛比錢入來, 又有冷氣嘆, 盡人事睇明佢地)..... (以下圖片出自本人, 但內容係跟書所講作簡單描述)


著名雕像: Wounded Niobid (受傷的尼歐碧德) ~ 創作時間約 440BC




著名雕像: Discus Thrower (擲鐵餅的人) ~ 西元2世紀的大理石像




呢個銅像好靚, 好熟口面, 您係邊位?? 



館內有幾多極靚嘅 mosaics.... 個人覺得好值得花時間欣賞。



之後, 去左羅馬鬥獸場, 不過暫時未考慮入場, 因為多年前已經去過 (雖然印象不深了)。先作預告, 我最後都在Cultural Week尾聲時, 貪唔駛錢, 入左去參觀。留番遲D再講。



鬥獸場附近, 有個凱旋門, 叫做 "君士坦丁凱旋門" (Arch of Constantine) 。



再之後, 坐 #11巴士 (本人對腳), 過去附近嘅 Roman Forum (羅馬議事廣場) 參觀。冇記錯的話, 呢個地方係免費入場。雖然Roman Forum依家成個爛鬼廢墟咁樣, 但想當年 (3千多年前), 原是繁華盛極嘅政治、司法與商業中心。







穿梭羅馬07 ~ 待續

Part 2 - 遊學羅馬!!

上年去意大利, 除左去都靈參觀同睇祖雲達斯踢球賽外, 另一個任務係去遊學。學左一年意大利文, 覺得唔去個國家練習, 改進唔倒；加上咁鐘意意大利, 就有充份藉口去意大利玩啦。
香港有一個機構, 專替人搞海外遊學, 我透過呢個機構, 報左一間在意大利學意文嘅學校。由於年假有限, 所以只可以報讀兩星期嘅課程。香港嘅機構, 只有一間聯系學校在意大利 ~ 在羅馬。本來我唔想去羅馬的, 因為以前已經去過兩次, 加上羅馬治安麻麻地, 不過冇第二間選擇, 而我覺得有agent安排, 省去我唔少時間, 所以最後跟agent安排去羅馬的學校。學校在火車總站(叫做Termini)附近, 所以好方便。

這是學校入口, 間學校有四層, 頂樓有個電腦房, 可以免費上網，不過房內7個電腦, 有3部喺我黎左咁耐, 到走個刻, 都仍然貼住張爛鬼紙話, "out of order, it is being repaired"之類嘅字, 好低能!!!






間學校原來頗厲害, 贏過d乜鬼教師獎, 有一定名氣。我返到香港後, 同一位來自羅馬嘅意大利文老師講起, 佢都話呢間學校幾出名, 呢個我真係事後先知道)。
間學校好多學生, 8/9成都係歐洲人，另外亦有唔少日本人同韓國人。至於中國人, 據講我係咁耐以來第二個。  之前一年同一時間 (2006年5月), 有個香港女仔都來讀過兩星期, 仲竟然咁啱都係住喺我個host family屋企。 遲d講下我host family嘅野比大家聽。
哈哈, 第一日返學, 我要早半個鐘返到去, 要考入學試, 然後做個oral test。位見我嘅職員竟然安排我去Level 2嗰班 (Level 1係beginners)。我冇信心, 叫佢比我去Level 1, 但佢係都話我應該要試下Level 2係點, 如果真係跟唔上, 第二天先落番Level 1, 咁唯有從命啦。
入左去Level 2個班房, 竟然10個人裡面得3個外國人, 其餘全部係日本同韓國人!  上課一開始, 個老師全程意大利文!  嚇死, 我喺香港上咁耐堂, 老師都係講英文/廣東話, 我都唔知阿madam講乜!!  小息時, 我即刻話我想轉班, 唔好攪我, Level 2我一定唔掂。
第二日, 轉去Level 1, 又竟然全班 (大約15人), 得我一個亞洲人喎, 咁極端嘅??!!  吓, 老師又係全程意文!!  不過就講得慢d, 而且如果真係唔明, 可以用好少嘅英文搭下。

下面係我地上堂嘅課室。地圖下面係我地某天在上堂時做嘅功課。 個老師超好人, 超攪笑, 上課一d都唔悶 (雖然有時唔知佢講乜, 不過佢會搞到你明佢講乜為止)。



上左兩星期, 加埋住喺host family屋企, 我發現我讀咁耐意大利文, 但程度實在太低, 激發我返到香港後要加倍努力讀書 (不過暫時都仍然係進步有限)。 同埋, listening係我最弱一環, 但識聽反而最重要, 唔知人講乜, 自已又點識回答人。


我host family家條街!  在羅馬市郊, 每日要搭20分鐘巴士先去到學校, 下回講下我host family嘅野比大家聽下呀!! 


~~ 奇妙羅馬之旅, 待續 ~~

Part 1 - 再訪羅馬!

之前完成左穿梭都靈嘅文章後, 好耐未再寫, 趁有些少時間, 就繼續講下我上年 (2007年5月)意大利旅程未分享嘅部份啦...
今次開始就講下羅馬。其實我以前去過羅馬兩次了, 不過就真係上世紀嘅事喇, 而且對d地方已經印象淡黃囉...同埋以前未有DC機, 影相冇依家咁方便, 可以有咁多functions攪...
喺寧靜嘅都靈坐飛機落羅馬, 好快就到達。一到達羅馬嘅Fiumicino機場，已經好似返左香港一樣 ~ 噪, 熱, 多人,  好懷念都靈, 真係想飛返都靈添...

許願池 ~ 相信大家都認識啦!   話唔再行過去許願池; 但最後, 點都係過去看看。實在太美麗, 太宏偉, 太壯觀, 而且太多人, 水聲太大添!!!  真係白雪雪, 好想行埋去摸下!! 
每次指定動作就係拋個銀仔去許願池, 祈求可以再訪羅馬。唔知都靈有冇個許願池係可以許願長居都靈呢?? 


機場出番市中心好方便, Leonardo Express機場火車, 就好似香港嘅機場快線, 唔記得正確價錢, 大約15歐羅左右一程, 就可以坐30分鐘火車直達市中心嘅Termini火車站。
值得一講係, 因為我坐內陸機, 所以在Terminal A check out, 但Leonardo Express上車處在Terminal C那邊, 所以我要推住個行李箱, 由Terminal A推到去Terminal C。Terminal A同Terminal C之間有架空天橋連接, 但冇窗嘅天橋內就一滴冷氣都feel唔倒, 而且條路超級長, 又轉來轉去!! 足足推左我半粒鐘有多, 痴線, 攪到我成身大汗!  (因為上年頭整親過條腰, 唔敢用背 "郎", 只好用行李箱)。
買飛等Leonardo Express火車好簡單, 有晒指示牌, 唔會搵唔倒。買飛時見到一對外籍旅客同時一齊買飛, 大家笑下當打個招呼咁。真係好多得見到佢地咋，因為我完全 "ling"唔起我個行李箱上火車嗰幾級樓梯 (慘!), 個男人即時offered幫我。哈哈哈哈, 一 "ling"起手, 佢即刻表現痛苦, 因為我個行李箱重到神經, 佢應該好後悔自告奮勇幫我!!    同佢兩位在火車講左陣計, 原來佢地來自澳洲!  都係亞洲人呀!! 
到達市中心火車總站 (Termini)時, 位澳洲先生亦好好人 (佢走唔到嘛, 哈哈), 再幫我拿件行李落車, 終於...佢講左句 ~ "A little girl, but a heavy luggage"!!!    我放左d乜鬼石頭喺個箱度呢??!!

繁忙嘅羅馬市中心Termini火車站。除左來往Fiumicino機場的Leonardo Express外, 去國內外城市嘅火車大部份都係從呢處開出的。在Termini要小心一d, 因為人流多而雜亂, 係偷東西嘅黑點, 仲有時見到吉卜賽人行來行去等搵食!!!  入黑後亦最好避免在此流連, 好多乞兒之類嘅古怪人開始浦頭。

不過Termini內有好大的商場, 麥記, pizza舖, 地庫又有好大嘅supermarket, 報紙檔, pharmacy, 食堂, 又有間有3層的書店, 仲連住地下鐵站, 所以好方便。Termini外面就係巴士總站, 有去市中心大部份景點 (包括鬥獸場等)嘅 #40同 #64號巴士, 同去市郊 (羅馬人返屋企)嘅不同巴士。




~~ 羅馬奇妙之旅 - 待續 ~~~